صوت مازن

كان نفسي يكون أول خبر ليا في مدونتي كويس وعليه القيمة بس قدر الله وما شاء فعل، للأسف أنا مضطر أقلكم ان رجليا اتجبست
"طب ما في داهية" طبيعي كل واحد فيكم هيقول كده... هو في حد فيكم يعرفني!، بس معلش...
المهم امبارح السبت كنت بلعب كورة مع ناس صحابي وانا أصلا مبحبش الكورة بس بصراحة يومها تجليت عالآخر وبعدين وانا بخش على واحد من فريق الأعداء صباع رجلي اليمين الصغير خبط في كعب رجل العدو قام حصل راح ناحية اليمين خالص وفضل كده، كل الصوابع على عدلة واحدة إلا الصباع ده، قعدت أقولهم يا اخواننا صباعي واجعني مش عايز ألعب، يقولولي انت بتستهبل البس شراب عليها وهي هتتعدل، أصلي كنت بلعب حافي، وبعدين رجعت البيت وبصراحة الوجع زاد عليا في البيت قامت أمي خدتني على مستشفى الجيش للعظام اللي في الحلمية، وعملت أشعة طلع عندي شرخ في الصباع الصغير المهم الدكتور كتبلي على جبس، قلت يللا معلش حتتين جبس حوالين الصباع والموضوع يمشي، رجت غرفة الجبس لقيت الراجل واخد رجلي من تحت الركبة لحد صوابعي قطن وبعدين قام لف الجبس حواليها، وانا أقوله يا أستاذ ده صباع رجلي الصغير بس نات بتهزر؟ طبعا الراجل مردش عليا بس مش مشكلة
حسبي الله ونعم الواكيل في اللي كان السبب