صوت مازن

تخاريف أحلام

امبارح بالليل كنت تعبان جدا فأخدت حباية "زرتك" وتقريبا مفعول الحباية كان عالي أوي، حلمت 3 أحلام أنما ايه دراما، أول حلم شفت فيه شخصية غالية على قلبي جدا، بس الظروف بعدتنا عن بعض، حلمت بالشخصية دي وهي بتقولي: "مش كفاية كده؟" وبعدين قلقت من النوم على الساعة واحدة بالليل، ونمت تاني، حلمت بإني ماشي في الشارع، ووقفني شوية بلطجية وقعدوا يضربوني بالمطاوي بتاعتهم وأنا أقاومهم بقى وعملت فيها بتاع بس المنبه أنقذني وصحيت عالفجر، نمت تالت وحلمت بحلم جامد جدا، أمن الدولة جاي عشان ياخدني بس مش في عربية، في طيارة هليكوبتر، تخيلوا المشهد طيارة هليكوبتر عليها لوجو أمن الدولة وفيها اتنين إخوة من الكلية جوة الهليكوبتر تقريبا أمن الدولة عدى عليهم قبلي، المهم الهليكوبتر هبطت في لاظوغلي وبعدين ودوني لظباط برتية عميد كان لابس بدلة، وقعد يقولي احنا مش عايزين غير شوية معلومات وبعدين هتروح، وأنا قلتله ماشي وبعدين سابني وراح يجيب حاجة بس اتأخر قمت أنا صحيت عالساعة 10، من كل الاحلام دي نستنتج انه لو حسيت بالملل ومش لاقي حاجة تعملها خدلك حباية "زرتك" ونام.