صوت مازن

حليت مشكلة صغيرة وساعتها فرحت أوي

النهاردة كان عندي يوم رياضي للأشبال، رحت مع الأولاد اللي بحفظهم في المسجد على الملعب وقسمنا الفرق واللعب ابتدى، أول مباراة كان الفريقين فيها مختلفين تماما، الفرقة الأولى كلها سن صغير من رابعة ابتدائي لحد اولى اعدادي، بس التعاون بينها كان جميل جدا، الفرقة التانية كلها كانت تانية اعداداي بس الروح بينهم منعدمة ومفيش أي ترابط أو تعاون، وصلت بيهم الدرجة ان الفرقة كلها سابت الجون عشان محدش عايز يقف جون، بالطبع الفرقة دي هي اللي خسرت وكانت نتيجة وحشة جدا 3/1 ، الماتش خلص وطبعا كل واحد من الفرقة عمال يتهم التاني بالتقصير، وانت بتأنّن وانت مبتعرفش تلعب وانت وانت وانت.......... انا بصراحة أول مرة الموقف ده يعدي عليا بالطريقة دي، هديت نفسي شوية ووقفت قدامهم وقلت: "واحد بس اللي يتكلم، واحد بس رفع ايده وابتدى يتكلم، أنا طبعا مكنتش بسمع حد انا بس حبيت كل واحد يطلع اللي جواه، وقعدت عشر دقايق كل واحد يقول اللي جواه لحد لما كله خلص كلامه، وزيادة في التأكيد سألت: حد عايز يقول حاجة تانية؟ كله سكت، ابتديت أتكلم، اسمع بقى لما الأستاذ يتكلم...تنحنحت شوية وابتديت: "بصوا يا رجالة، دلوقتي انتوا فريق، والفريق المفروض انه يكون ليه هدف يحققه، لو جينا شفنا حالتكم دي، هل فريقكم ده حقق هدفه؟ بالطبع لأ، علشان أول حاجة الهدف المشترك بينكم مش موجود والدليل انكم كلكم سيبتوا الجون اللي هو المفروض تدافعوا عنه عشان ميدخلش فيه اجوان، امال انتوا بتلعبوا ليه دلوقتي؟ مفيش هدف للعبكوا مع بعض، لازم أول حاجة يبقى لينا هدف مشترك لينا وهو اننا نكسب الماتش الجاي، تاني حاجة ننسى أي حاجة ليها علاقة بالماتش اللي فات، احنا مجموعة جديدة خالص جايين نلعب مع بعض ماتش جديدة وكلنا متحمسين للفوز في الماتش ده، ماشي يا رجالة؟" "ماشي يا أستاذ" المهم الماتش التاني ابتدى وانا ايدي على قلبي نفسي يفوزوا في الماتش علشان كلامي يبان له معنى، بصراحة لعبهم كان جميل جدا والتعاون ظهر بشكل جميل وبرغم ان مستواهم كان أقل من الفرقة اللي قدامه لكن الحمد لله الفرقة فازت ونظريتي نجحت،نظريتي نجحت يا رجالة،واللي فرحني اكتر لما سمعت واحد منهم بيقول لفرقته: "يعني لو كنا لعبنا كده من الاول مش كان زمانا فايزين الماتشين" حسيت بالانجاز والانشكاح، ومن هذا الموقف نستنتج انه لو عايز تحل مشكلة بين أطفال إوعى تعاملهم معاملة الأطفال.