صوت مازن

جالي تاج من سمسم، وطبعا انا مكنتش عارف يعني ايه تاج، التاج في اللغة هو عبارة عن سؤال أو حاجة زي كده والسؤال ده بيتمرر على أصحاب المدونات، تقريبا برضه، سمسم تفضلت مشكورة وقالتلي اتكلم يا مازن عن عشر حاجات عن نفسك، وبما إني فاشل جدا في التعبير عن نفسي، هحاول وأمري لله:

1- الطفولة: أنا طفل جدا، بل وأحيانا عيل، كل اللي حواليا بيقولوا عليا كده، ممكن تكون الصفة دي كويسة في البنات لكن في الولد بتبقى صعبة جدا، وعلى رأي المثل: "دلع الفقارة بيفقع المرارة" لكن من ميزات الطفولة اللي انا لسة فيها ان محدش بيزعل مني مهما دبشت في الكلام، لأني بالمناسبة كلامي زي السكر، لأني لما بكلم حد مبجملش كلامي اللي بحس بيه بقوله، ناس كتير في الأول كانت بتزعل مني، بس دلوقتي الناس بقت تعجب بصراحتي وبيحبوا ياخدوا رأيي، من صفات الطفولة اني مبشيلش هم مهما كان بيحصلي، وطبعا علشان انا عيل بتقمص بسرعة وبتصالح أسرع.

2- المنطق: بالرغم من تعارض التفكير المنطقي مع الطفولة، فانا بفكر بمنطق يغيظ، 1+1=2 طبعا مش كل الحياة كده بس انا اكتشفت ان التفكير المنطقي بيحل مشاكل كتير جدا، ناس كتير لما يتناقشوا معايا ويكونوا معارضين لوجهة نظري بيتخنقوا مني بسرعة لاني برتب الكلام وأخلص المناقشة لصالحي حتى لو انا غلطان بسبب المنطق.

3- الإرادة الضعيفة: مضحكش عليكم انا إرادتي ضعيفة جدا تكاد تكون منعدمة، وسبب معظم مشاكلي هي ضعف الإرادة، عدم مذاكرتي في الثانوية العامة، سقوطي في الكلية، لما اخسر في شغلانة، يعني الحمد لله الموضوع ده مكرهني في نفسي جدا ونفسي يتغير.

4- مليش صديق صدوق: طبعا كلنا شفنا تيمون وبومبا في حلقة عيد الصداقة الصدوقة، للأسف انا مبحتفلش في اليوم ده، أصحابي وزمايلي بعدد شعر راسي وقريبين جدا من بعض، لكن لو حد سألني تحب لو تهت في الصحراء مين من صحابك يكون معاك أقولك مش هتفرق، مفيش حد أقوله أسراري، مفيش حد لما أحس بمشكلة برجعله، كتير من أصحابي بيستشيروني في حل مشاكلهم، عشان انا الصدر الحنين بتاعهم، لكن انا كاتم في قلبي ومخبي.

5- بابا: أبويا ده راجل محصلش، من الشخصيات القليلة اللي بحترمها وبحترم دماغها جدا، طريقة تربيته لينا فوق الرائعة عمره ما غصب حد على حاجة وعمره ما فرض رأيه على حد، مع ان كل اللي بيعوزه بيتعمل بس بمزاجنا، العيلة كلها بتعتبره كبيرها مع ان جدي عايش وليا أعمام أكبر منه، دمه خفيف جدا وساخر جدا واعتقد اني اخدت منه الحتة دي، هو علمني التجويد وانا علمته السباحة والنت، بسبب ظروف سفره علشان هو بيشتغل في الكويت البيت بيبقى ناقص كتير فعلا، اهو الصيف قرب وأبويا كمان قرب ييجي.

6- الإخوان: كل حاجة كويسة اتكونت في شخصيتي كانت بفضل الله ثم الإخوان، سنوات عملي في صفوفهم قاربت على الخمس سنوات، اكتسبت فيها خبرات أكثر بكثير من سنوات عمري الـ18 التي سبقتهم، محاورة الناس، الإلقاء، مواجهة وسائل الإعلام، أساليب التعامل مع الشخصيات المختلفة، مهارات التفاوض، اظهار العواطف، لو قعدت اليوم كله مش هخلص، تربية الإخوان غيرتني كتير ورجعتني للطريق الصحيح بعد ما كنت قريب للضياع.

7- صوتي حلو: الحمد لله ربنا رزقني حلاوة في الصوت بالرغم من إن شكلي مش عاطفي خالص، لما بكون مع أصحابي بيقدموني للإمامة في الصلاة، وفير الكلية بقرأ القرآن على المدرج كل يوم الصبح، ولما نكون في الاعتكاف في رمضان بأذن للصلوات، نفسي احفظ القرآن كله وآخد إجازة في القراءات.

8- الدعاية والاعلان: المجال ده بحبه جدا، وده أحد المجالات اللي دخلتها بسبب الإخوان، اتعلمت التصميم والتعامل مع المطابع والكلام ده كله منهم أيام الانتخابات وفي الحاجات اللي كنا بنعلقها أو نوزعها في الجامعة، دلوقتي بقى مجال عملي اللي بكسب منه فلوس، وبحبه جدا جدا ونفسي أكبر فيه، من صيف 2006 لحد دلوقتي شغال في المجال ده، والحمد لله اكتسبت خبرة كبيرة وكونت قاعدة عملاء كويسة ممكن أبدأ منها مشروع كويس في الصيف، ادعولي مشروعي ينجح.

9- الزواج: أنا من الناس اللي بتؤمن بالزواج المبكر للرجل أو للمرأة على حد سواء، وبما انه طبعا العين بصيرة والايد قصيرة يبقى هنكتفي بالكلام عنه وعن ميزاته بلا تطبيق حتى إشعار آخر، أنا شايف انه استقرار نفسي وجسدي وبداية لحياة جديدة، طبعا امكانيات الزواج دلوقتي مش في متناول الجميع، بس المشكلة دي ممكن تتحل بسهولة جدا لو كل طرف من الأطراف بطل ينشف دماغه، أبو البنت عايز العريس يبدأ من حيث انتهى هو، يعني لو أبو العروسة بيقبض 4000 جنيه يبقى لازم العريس يكون بيقبض زيهم، وأصلا تلاقيه بادي حياته في أوضة فوق السطوح، يعني لو انا رحت لواحد أتقدم لبنته وقالي كلام من ده انا ممكن أقلب عليه وأدب معاه خناقة، علشان انا بتفقع بسرعة من الحاجات دي، أهل العريس بقى يبطلوا الحوارات اللي من نوع "دي مش من مستوانا" "دي وحشة" "دي سنانها معووجة"، الكلام ده مبقاش يجيب همه، يعني زي ما قال الرسول: "فاظفر بذات الدين تربت يداك" والله ذات الدين هي اللي هتخلي بيتك جنة، يعني لا اللي دمها خفيف ولا الحلوة ولا الغنية، الموضوع شكله هيفتح معايا فلازم أبطل هنا.

10- مكنتش عايز اتكلم عنها بس مقدرتش، بالرغم من انتهاء كل اللي كان بينا لكن مقدرش انكر ان لسة في حاجة حاسس بيها، مقدرش دلوقتي غير اني أتمنى لها حياة سعيدة كلها أمان وراحة بال.


ماشي يا رجالة التاج خلص وإلى اللقاء في التاج القادم، والسلام عليكم ورحمة الله وبركاته.