صوت مازن

السلام عليكم... بقالي فترة مرميتش حاجة في المدونة، قلت أنعشها حبتين قبل ما أقفل الجهاز وأقولكم على موجز الأحداث، أنا طبعا في فترة امتحانات اليومين دول بس معايا مادتين بس امتحنت واحدة وفاضل واحدة هخلصها بإذن الله يوم الأربع وبعد كده اتفرغ لشغلي، بصراحة أنا ناوي على كام نية كده لو مشيوا معايا صح هتفرق معايا في الشغل كتير وهبقى بإذن الله من كبار رجال الدعاية والإعلان في شرق القاهرة.
من فترة وأنا حاطط عيني على واحدة علشان أتقدملها بس اتخطبت من كام يوم، ربنا يسعدها ويرزقها حياة سعيدة، وهذه هي الزونبة التانية.
شلت دلوقتي فكرة الارتباط من دماغي وناوي أظبط نفسي في الشغل وبعدين ربنا يسهل.
بدات الحمد لله في حفظ القرآن بقالي 10 أيام وحفظت لحد دلوقتي أكتر من حزب، تقريبا 12 صفحة، ربنا يسهل وأمشي على كده لحد ما أختم على رمضان الجاي بإذن الله.
أبويا جاي ان شاء الله من الكويت يوم 5 الجاي، بصراحة لما والدي بينزل مصر البيت بيبقى فيه توازن، خصوصا ان أبويا بيعرف يحكم البيت بهدوء وبدون انفعال ونرفزة زي أمي، معذورة برضه لازم تبقى أم وأب في نفس الوقت فالضغط عليها بيبقى كبير خصوصا ان أنا بني آدم مقرف انا واخواتي.
شكرا لاستماعكم لنشرة أخبار أيام من حياة مازن والسلام عليكم ورحمة الله وبركاته.