معية الله
"ربنا معاك، معانا ربنا، روح انت بس وربنا معاك" عبارات كتيرة بنسمعها على طول، لكن بنحس بيها ولا لأ؟
هل احنا فعلا حاسين ان ربنا معانا، شايفنا عارف احنا بنعمل ايه، شايف اللي احنا فيه؟
المعنى ده لو اترسخ جامد في نفوسنا هيترتب عليه معنيين، المعنى الأول ان ربنا معانا على طول وعارف اللي بنعمله ولو احنا فعلا حسينا بالمعنى ده هنخجل اننا نعصاه، يعني ميصحش تعصى ربنا وهو شايفك، دي تبقى وحشة في حقك يا راجل، عايز تعصاه اعصاه في حتة هو مش شايفك فيها، وابقى قابلني لو لقيت الحتة دي.
المعنى التاني ان ربنا مش هيسيبك تتأذي، يعني مثلا لو انت خايف من حاجة معينة خوفك منها هيخليك تبعد عن طاعة معينة، أو عبادة لله، فده معناه انك مش حاسس ان ربنا مش معاك، معناها ايه لو انت خايف تعبد ربنا علشان في واحد ظالم بيمنع الناس من اهنا تعبد ربنا، مش ربنا شايفنا وعارف اللي بيحصل؟ اكيد ربنا مأخر عقاب الظالم ده لحكمة معينة.
لكل الناس اللي بيقولولي يا مازن ابعت عن السكة اللي انت ماشي فيها دي، ممكن تتأذى وممكن يحصلك مشاكل وممكن يحطوك في دماغهم وممكن تتمسك وممكن وممكن وممكن....
لكل الناس دي بقولها: ربنا معايا وأكيد مش هينساني
هناك 5 تعليقات:
هو بص يا مازن انا اولا بحب مدونتك ومن قرائك دايما
بس مش مش فاهمه تقصد ايه بجمله....ابعد يا مازن عن الطريق اللى انت ماشى فيه.........
انا مقتنعه بكل حاجه
بس ربنا مقالناش بردو ندمر مستقبلنا وحياتنا
يامازن ربنا بيحبنا
يارب تكونى فكرتى وصلت
اتمنى لك حياه سعيده وسويه
اختك
بصي يا أسماء، انا فهمت كلامك لأني سمعته كتير جدا ومن ناس بكل الأنواع، ربنا بيحبنا مفيش انكار للكلام ده، طيب اللي بيحبني مش لازم أنا كمان أحبه؟ لأ وكمان أضحي علشانه.
المستقبل بقى والحياة واذا كان هيتدمر ولا لأ كل دي حاجات في ايد ربنا، هعرضلك كذا مثال من دمار المستقبل اللي سمعتها كتير، مش هتشتغل يا مازن، هيتقبض عليك يا مازن، أمن الدولة هيعملك ملف يا مازن، هيتضيق عليك في أكل عيشك يا مازن.
طبعا كل ده كلام جميل وأكيد ممكن يحصللي، طيب مين اللي في ايده كل ده، الرزق والأمان والعمر كله، مش ربنا، يعني وأنا ماشي في سكتي اللي بتودي في داهية دي زي ما بيقول الناس ربنا مليون في المية شايفني، مفيش اعتراض على كده، طيب بما ان ربنا عارف اني ماشي في السكة دي عشانه هو بس، ليه مبيحمينيش من الأذى ده؟؟؟
ببساطة لأن ده مش أذى، ده اختبار من ربنا بيشوف هل أنا بعمل كده علشانه هو ولا علشان هدف تاني، والكلام ده مش من دماغي، في سورة العنكبوت في أول السورة: "ألم، أحسب الناس أن يتركوا أن يقولوا آمنّا وهم لا يفتنون، ولقد فتنّا الذين من قبلهم فليعلمن الله الذين صدقوا وليعلمن الكاذبين" حاجة بسيطة خالص، وأولا وأخيرا المستقبل في ايد ربنا والعمر كله في ايد ربنا، أنا مجرد عبد لله أمرني بأني أعبده وأقوم بواجبي في الامر بالمعروف والنهي عن المنكر، أتمسك بقى ملاقيش شغل أتقتل حتى، كله بأمر الله، "قل لن يصيبنا إلا ما كتب الله لنا" ولو انا متقدرلي حاجة وحشة لو مستخبي في بيتنا ومبطلعش منه هتحصلي هتحصلي، أنا عارف اني طولت في الكلام بس كان لازم أطلع اللي جوايا علشان ناس كتير كلمتني في المواضيع دي
وانا بجد مبسوطه انى بسمعك بس يا مازن
انت تقدر تفيد دينك واسلامك واحيي فيك حبك لله وحبك لدينك ..وحماستك اللى نادره بجد
بس مش بالطريقه دي
خليك متميز ف حاجه مش تضيع نفسك احنا محتاجين علماء يوقفوا مصر على رجليها او تعالى نقول يوقفوا الدوله الاسلاميه على رجليها
يعنى م الاخر تفوق ف مجالك وهتخدم اسلامك اكتر ودينك
وخد بالك من نفسك
ف معيه الله اخى
بص يا مازن انا حابه حماستك والله ومش عارفه ارد على كلامك ازاي
بس هتكلم باحساسى بقى
بص هو ربنا امرنا اننا نفرح اهلنا تمام؟ونطيعهم ومنزعلهمش
فبيتهيالى مامتك وباباك مش هيبقوا مبسوطين وهما شايفين ابنهم تعبان ف حياته و و و .......
بس اكيد هيبقوا مبسوطين لما يشوفوك ناجح وسعيد
غير كده الامه الاسلاميه بحاجه لحماسه وشجاعه الشباب اللى زيك عشان يطوروها
ايه رايك لو نصلح من نفسنا ونغير اللى حوالينا على قد ما نقدر من غير ما ندمر نفسنا
ونبقى متميزين وناجحين ف شغلنا
وربنا يكرمك يا مازن يارب
ياريت ربع الشباب فيهم حماستك وحبك لدينك
الله يوفقك
جزاك الله خيرا على كلامك، بس انا ثابت على كلامي وعلشان منتجادلش كتير، كل واحد يحاول يخدم دينه من الحتة اللي هو شايف انها صح وربنا يوفق الجميع
إرسال تعليق