صوت مازن

على بلد المحبوب وديني

النهاردة هعترف بسر خطير، أنا صعيدي، عاااااااااااااااااااااااااااا. اه والله أنا صعيدي، بس عمري ما نزلت الصعيد في حياتي إلا من أسبوع، كان فرح ابن عمي وعمي خلاني أروح أسيوط غصب واقتدار، المهم عقدنا العزم وأكيد مكانش ينفع أضرب المشوار ده لوحدي فأخدت معايا ابن عمتي لأن أخويا سبقني على هناك قبلها بيوم، بالمناسبة أخويا راح برضه غصب واقتدار، بلدنا اسمها بني حسين، تقع بني حسين في محافظة أسيوط بين مدينتي "الحوتكة" بفتح الحاء والواو وتسكين التاء، ومدينة "منقباد" والتي يقول عنها الشاعر: "منقباد يا بلد الحبايب منقباد" ضربنا مشوار مقرف بكل المقاييس البشرية، السكة طويلة جدا، العربية ماشية ماشية ماشية ونلاقي نفسنا في بني سويف، نمشي نمشي نمشي نلاقي نفسنا لسة في بني سويف، فين وفين لما وصلنا بني حسين على 8 صباحا، ملحوظة: احنا اتحركنا 2 ليلا، بعد ما وصلت فطرت لبن بالفايش، الفايش ده حاجة عاملة زي التوست بس ناشفة، كان يوم جمعة، نمت شوية كده وبعدين صحيت للصلاة، نمت في الخطبة طبعا، وصحيت عالصلاة، صليت عند الجعابصة، الجعابصة دول ناس بيشتغلوا حانوتية، الجعباص في اللغة هو الحانوتي، المسجد بقى كان عند بيوت الجعابصة، طبعا شفت صعايدة كتير من كل الأنواع والأعمار صعايدة صغيرين وصعايدة كبار، صعايدة قصيرين وصعايدة طوال، من ضمن الحاجات اللي اتعلمتها انهم بينطقوا أحمد بكسر الهزة، "إحمد" لحد دلوقتي معرفش ليه بس أكيد لحكمة يعلمها الله، فرح ابن عمي كان كتب كتاب بس فمطولناش هناك ورجعنا على مصر تاني في نفس اليوم ووصلت مصر عالساعة 2 ليلا برضه يعني الموضوع كله أخد مني 24 ساعة، أسيبكم مع ألبوم الصور....

أنا وابن عمتي واخويا قاعدين في حوش البيت على الدكة البلدي أخويا طبعا ماسك الكوز بيشرب عشان كان عطشان وأنا قاعد فرحان معرفش ليه

مجموعة من خيرة شباب بني حسين، واللي لابس جلبية بيضة هناك ده هو العريس

ده بقى يبقى "إحمد" وهو من أبناء بني حسين المتميزين بس طبعا كلن لابس طقم الفرح.

صورتي مع حمار العيلة، طبعا أنا اللي فوق، والحمار كان غلبان جدا وطيب وابن ناس

ده بقى يبقى المأذون، مأذون بني حسين بقى، واللي قدامه دي السجاير اللي جاياله من المعازيم، عند الصعايدة عادة زي الزفت، وهي انهم مبيعزموش على بعض غير بالسجاير، المأذون وهو قاعد بقى قدامه أكتر من 20 سيجارة في ثواني، أنا اتعزم عليا بكمية سجاير كتير قوي أحاول أقنعهم اني مبدخنش، وهم راسهم وألف شيء كويس قديم اني بتكسف منهم.

وبعد هذه الجولة الصغيرة في أرجاء بني حسين العامرة، أرض الآباء والأجداد، نصيحة لله لو انت صعيدي متسمعش كلام عمك وتروح فرح ابنه.