صوت مازن

الغيبة الطويلة

أسبوع بحاله كنت قاعد في اسكندرية مفيش قدامي غير البحر، بقالي كتير مقعدش فترة كبيرة كده مبعملش فيها حاجة، راجع القاهرة وانا مليش نفس أعمل حاجة خالص، لسة بقى قدامي فترة لحد ما افوق وأرجع لدوامة الحياة في القاهرة، أنا كل سنة بصيف البيطاش، السنة حصلت حاجة زعلتني أوي، الشاطئ اللي في شارعنا حولوه لشاطئ خاص جدا، وطبعا الشاطئ لما يبقى خاص جدا بيبقى زي ما انتوا عارفين بيبقى شاطئ من غير هدوم، بيتنامى الاحساس بالغربة لما تلاقي الناس اللي حواليك غرقانين في المعاصي والرذائل، مش هقول اني من أصحاب السبح، وإني مقطع السجادة، لكن شعور كبير جدا بالمرارة كنت بحس بيه وأنا شايف ناس أسلوب حياتها كله تحدي لشرائع الله وأوامره، جنب الشاطئ ده في مسجد، كنت بقعد في المسجد ده وأنا مستشعر معنى الحديث الشريف: "عبادة في الهرج كهجرة إليّ" الرسول يشبه العبادة في وسط المعاصي والرذائل بالهجرة إليه، معنى جميل جدا محسيتش بيه إلا هناك، حسيت ان قدامنا مشوار طويل أوي مليء بالشوك والمصاعب عشان نرجع الناس تاني لربها، وده مش هيحصل غير لما كل واحد يدي كل طاقته ويقدم تضحيات كتير جدا من أجل الدعوة إلى الله.